പച്ചനിര്‍മ്മിതികളെക്കുറിച്ച് ഞാന്‍ എഴുതട്ടെ- ഹരിതം എന്ന് എഴുതുവാന്‍ തന്നെ പേടി! വഴിയില്‍ ഇറങ്ങിയാല്‍ എല്ലാ ഭിത്തികളിലും നിറയെ ഹരിത പരസ്യങ്ങളാണ്. ഹരിത ഫ്‌ളാറ്റ്, ഹരിത ടൗണ്‍, ഹരിത ഉപകരണങ്ങള്‍ ഇത്യാദി വാചകങ്ങള്‍. മാധ്യമങ്ങളിലും മനസ്സിലും ഹരിതം കടന്നു കൂടിയിരിക്കുന്നു. ഇപ്പോള്‍ ഗ്ലാസിലും കോണ്‍ക്രീറ്റിലുമെല്ലാം ഹരിത ഛായ! ഞാന്‍ മടുത്തു! ഹരിതമെന്നു പറഞ്ഞാല്‍ നാട്ടുകാര്‍ അടി തരുന്ന അവസ്ഥ ആയിരിക്കുന്നു.

നാം ജീവിക്കുന്ന കാലഘട്ടത്തിന്റെ അനിവാര്യതയായി സമതുലിത നിര്‍മ്മാണരീതി മാറിയത് ഈ അടുത്ത കാലത്താണ്. അനിയന്ത്രിതമായ ജനസംഖ്യാ വര്‍ദ്ധനയും നഗരവത്ക്കരണത്തിന്റെ തീക്ഷ്ണതയും ആണ് ഇത്തരം ഇടപെടലുകള്‍ അനിവാര്യമാക്കിയത്. ഇക്കഴിഞ്ഞ ഭൗമദിനത്തിന്റെ സന്ദേശം നാം ഓര്‍ത്തെടുക്കേണ്ടതുണ്ട്. ‘7 ബില്ല്യണ്‍ സ്വപ്‌നങ്ങളും അവയെ എല്ലാം സാക്ഷാ ത്ക്കരിക്കാന്‍ ഒരു കൊച്ചു ഭൂമിയും’ എന്നതായിരുന്നു ഈ ഓര്‍മ്മപ്പെടുത്തല്‍. വര്‍ദ്ധിക്കുന്ന ജനസംഖ്യയുടെ ആവശ്യത്തിന് ഭൂമിയിലെ വിഭവങ്ങള്‍ തികയുന്നില്ല. ജീവിതത്തിന്റെ സമസ്ത മേഖലയേയും അഭിമുഖീകരിക്കുന്ന വെല്ലുവിളിയാണിത്.

എന്നുവച്ച് നമുക്ക് ജീവി ക്കേണ്ടേ? വേണം! പക്ഷേ; വളരെ കരുതലുകളോടു കൂടി വേണം മുന്നോട്ടു നീങ്ങുവാന്‍. പണ്ടു പ്രവാചകന്‍മാര്‍ പറഞ്ഞതുപോലെ ഭൂമി എത്ര കാരുണ്യത്തോടു കൂടിയാണ് പൂര്‍വ്വപിതാക്കന്മാര്‍, നമുക്ക് കൈമാറിയത്. അതേ കാരുണ്യത്തോടെ നമ്മളും ഈ ഭൂമിയെ വരും തലമുറയ്ക്ക് സുരക്ഷിതമായി കൈമാറണമെന്നത് നമ്മുടെ മാത്രം ചുമതലയാണ്.

പരിസ്ഥിതിയുടെ മേലുള്ള അധിനിവേശ പ്രവര്‍ത്തനങ്ങളെപ്പറ്റി വീണ്ടും പറയേണ്ടതില്ല. കേരളത്തിനെ മുച്ചൂടും നശിപ്പിച്ചത് മുന്‍കരുതലുകള്‍ ഇല്ലാതെ നടത്തിയ കെട്ടിട നിര്‍മ്മാണം ആണെന്നു പറയേണ്ടിവരും. മരങ്ങള്‍ വെട്ടിമുറിച്ചും ഭൂമി ഉഴുതു നിരത്തിയും നമ്മള്‍ കെട്ടിടങ്ങള്‍ കെട്ടി വയ്ക്കുകയാണ്. പ്രകൃതിയുടെ ക്ഷോഭമായും സങ്കടമായും ഇടയ്ക്കിടെ ഉണ്ടാകുന്ന ദുരന്തങ്ങളും ഈ ജനതയെ ഒന്നും പഠിപ്പിക്കുന്നില്ല. ‘ഒരു മരം നടുമ്പോള്‍ ഒരു തണലാണ് നടുന്നതെന്ന’ കവി വചനം പൂര്‍ണ്ണമായും വിസ്മരിക്കപ്പെടുന്നു. ഒരു വീടെന്നാല്‍ മുറികളുടെ സങ്കലനമല്ല എന്നും, മറിച്ച് നമുക്ക് ചുറ്റുമുള്ള മണ്ണും മരവും ഒക്കെ കൂടിച്ചേര്‍ന്നതാണെന്നുമുള്ള പൂര്‍വ്വസങ്കല്പത്തിലേക്ക് നാം തിരിച്ചു വരേണ്ടതുണ്ട്.

വരണ്ട ഭൂമിയായി കൊച്ചു കേരളത്തെ സങ്കല്പിക്കുവാന്‍ പോലും കഴിയുന്നില്ല. ജല സമൃദ്ധമായ ഈ സംസ്ഥാനം വരള്‍ച്ചയിലേക്കു കൂപ്പുകുത്തുവാന്‍ ഒരു കാരണം നിര്‍മ്മാണമേഖലയിലെ വിരുദ്ധ പ്രവര്‍ത്തനങ്ങളാണെന്നു പറയാം. കക്കൂസ് മാലിന്യങ്ങളെ ഒഴുക്കി കളയുവാന്‍ മാത്രം ഒരു ദിവസം 5 ബില്ല്യണ്‍ ലിറ്റര്‍ വെള്ളമാണത്രേ നാം ഉപയോഗിക്കുന്നത്. 5 ബില്ല്യണ്‍ ലിറ്റര്‍! 5 എന്ന അക്കത്തിന് പിറകില്‍ എത്ര പൂജ്യങ്ങള്‍! മനസ്സിലാകാത്തത്ര വ്യാപ്തിയിലേക്കാണ് ജലദൗര്‍ലഭ്യം വളരുന്നത്. കേരളത്തിലെ 44 നദികളും മരണശയ്യയില്‍ എന്നാണ് വിദഗ്ധര്‍ പറയുന്നത്. ഒരു കാലത്ത് ഉചിതമായ നിര്‍മ്മാണ വസ്തുക്കളുടെ അനര്‍ഘമായ ഖനിയായിരുന്നു നമ്മുടെ പ്രകൃതി. കാലം വരദാനമായി നമുക്ക് കാത്തുവച്ചിരുന്ന ഈ വിഭവങ്ങളൊക്കെ ദുരയോടെ, ആര്‍ത്തിയോടെ ഖനനം നടത്തി അവയൊക്കെ ചെളിക്കുഴികളാക്കി മാറ്റിയിരിക്കുന്നു.

ഭൂമി, നിര്‍മ്മാണരീതികള്‍, നിര്‍മ്മാണവസ്തുക്കള്‍, ഡിസൈന്‍, പ്രകൃതിശക്തികള്‍ അതായത് സൂര്യന്‍, ചന്ദ്രന്‍, കാറ്റ്, മണ്ണ്, വെള്ളം തുടങ്ങിയവ. ഇങ്ങനെ അഞ്ചു കാര്യങ്ങളാണ് പ്രകൃതി.

ഭൂമി

കേരളത്തിന്റെ ഭൂമിശാസ്ത്രപരമായ പ്രത്യേകതകള്‍ ഒരു വാസ്തുശില്പി ശ്രദ്ധിക്കേണ്ടതുണ്ട്. സമൃദ്ധമായ മലനാടുകളും, ഇടനാടുകളും, ദീര്‍ഘമായ തീരപ്രദേശങ്ങളും ചേര്‍ന്നതാണ് കേരളത്തിന്റെ ഭൂപ്രകൃതി. എല്ലാക്കാലത്തും ഈ പ്രകൃതിയുമായി സമരസപ്പെട്ടു കൊണ്ടാണ് തനതായ വാസ്തുശില്പങ്ങള്‍ വികസിപ്പിച്ചിട്ടുള്ളത്. അതുകൊണ്ടു തന്നെയാണ് കാഞ്ഞിരപ്പള്ളിയിലെ വീട്, തിരുവനന്തപുരത്തുള്ള കടപ്പുറത്തെ വീടില്‍ നിന്നും വ്യത്യസ്തമായിരിക്കുന്നത്. ഭൂവിനിയോഗത്തില്‍ കടുത്ത അനാസ്ഥയാണ് നാം കാണിക്കുന്നത്. കുന്ന് ആണെങ്കിലും കുഴി ആണെങ്കിലും വെട്ടി നിരത്തി മൈതാനങ്ങളാക്കി കെട്ടിടങ്ങള്‍ അഭംഗുരം വളരുകയാണ്. പ്രകൃതിദുരന്തങ്ങളിലേക്കുള്ള ചൂണ്ടുപലക ഇത്തരം വികലമായ നിര്‍മ്മാണ പ്രവൃത്തികളാണ്. ഭൂമിക്കനുസരണം നിര്‍മ്മിതി വേണമെന്ന് ശഠിച്ചത് ജൈവ വാസ്തുശില്പത്തിന്റെ പിതാവായ ഫ്രാങ്ക്‌ലോയിഡ് റൈറ്റാണ്. വീടുകളുടെ ഹരിതകല്പനകളുടെ മൂലസ്ഥാനം ഭൂമിയോടുള്ള ആദരവു തന്നെയാണ്. വിശ്വാസി അല്ലെങ്കില്‍ പോലും ഞാന്‍ ഒരു കാര്യം എടുത്തെഴുതട്ടെ! ഭൂമി ദൈവദത്തമാണ്. അതിനെ മുറിപ്പെടുത്തുവാന്‍ ഉള്ള അവകാശം മനുഷ്യനില്ല. വാസഗൃഹത്തിനുള്ള ഭൂമിയുടെ തെരഞ്ഞെടുപ്പില്‍ ഏറെ മാനദണ്ഡങ്ങള്‍ പണ്ടത്തെ ആളുകള്‍ പാലിച്ചിരുന്നു. ഭൂമിയില്‍ പതിക്കുന്ന ജലത്തിന്റെ ഗമന നിര്‍ഗമന മാര്‍ഗ്ഗങ്ങള്‍ പോലും കെട്ടിടസ്ഥാന നിര്‍ണ്ണയത്തെ സ്വാധീനിച്ചിരുന്നു. വാസ്തുപുരുഷനോടുള്ള ആരാധന ശരിക്കും ഭൂമിയോടുള്ള ആദരവ് തന്നെയായിരിക്കും. കഴിയുന്നതും മരങ്ങള്‍ മുറിക്കാതെ വാസഗൃഹങ്ങള്‍ നിര്‍മ്മിച്ചിരുന്ന പൈതൃകം എത്രപെട്ടെന്നാണ് മാഞ്ഞുപോയത്! വരുംകാലങ്ങളില്‍ ചെറിയ ഭൂമിയില്‍ വീടുവയ്ക്കുവാന്‍ നിര്‍ബന്ധിക്കപ്പെടുമ്പോഴെങ്കിലും ഹരിതവ്യവസ്ഥകള്‍ പാലിക്കപ്പെടുന്നുവെന്ന് ഉറപ്പാക്കുക.

ഡിസൈന്‍

ഭൂമിക്ക് കെട്ടിടങ്ങളുടെ ഭാരം ചുമക്കുവാനുള്ള ശേഷി കുറഞ്ഞു വരികയാണ്. നഗരഭൂമി അമൂല്യമായ വസ്തുവായി മാറിക്കഴിഞ്ഞതുകൊണ്ടും; മലയാളി സമൂഹം കൂട്ടുകുടുംബത്തില്‍ നിന്നും അണുകുടുംബങ്ങളിലേക്ക് ചേക്കേറുന്നതിനാലും നേരത്തെ ഹൃദിസ്ഥമാക്കിയിരുന്ന സമവാക്യങ്ങള്‍ തെറ്റുന്നു. ചെറിയ ഭൂമിയില്‍ ചെറിയ വീടുകളാണ് കാലം ആവശ്യപ്പെടുന്ന വെല്ലുവിളി. ഈ പ്രക്രിയയ്ക്ക് ശ്രേഷ്ഠമായ സാമൂഹ്യമാനങ്ങള്‍ ഉണ്ടെന്ന് നാം മനസിലാക്കണം. തലമുറകള്‍ കൈമാറി സൂക്ഷിക്കുന്ന നിധി എന്ന സങ്കല്പത്തില്‍ നിന്ന് മലയാളി ചുവടു മാറ്റിയിരിക്കുന്നു. ഒരിക്കലും വരാത്ത അതിഥിക്കുവേണ്ടിയും വാങ്ങാത്ത കാറുകള്‍ക്ക് വേണ്ടിയും അഭയസ്ഥാനങ്ങള്‍ നിര്‍മ്മിക്കുന്നത് വങ്കത്തരമാണ്. അതുമാത്രമല്ല പരസഹായമില്ലാതെ വൃത്തിയായി ഉള്‍ത്തളങ്ങള്‍ സൂക്ഷിക്കുവാന്‍ ഏറ്റവും എളുപ്പം ചെറിയ സ്ഥലങ്ങളാണ്. ചെലവു കുറഞ്ഞ പരിസ്ഥിതിക്കനുയോജ്യമായ ഊര്‍ജ്ജം സംഭരിക്കുന്ന നല്ല വീട് എന്ന സങ്കല്പം ചെറിയ വീടുകള്‍ തന്നെയാണ്. ഇതോടൊപ്പം തന്നെ പ്രചരിപ്പിക്കേണ്ട ഒരാശയമാണ് ‘വളരുന്ന വീട്’ എന്ന സങ്കല്പം. ആവശ്യങ്ങളും അത്യാവശ്യങ്ങളും തമ്മില്‍ തിരിച്ചറിയുകയും അത്യാവശ്യങ്ങള്‍ നിര്‍വ്വഹിക്കുന്ന രീതിയില്‍ രൂപകല്പന ചെയ്യേണ്ടതുമാണ് ഈ സങ്കല്പം. വളരെ ശാസ്ത്രീയമായി രൂപകല്പന ചെയ്യുകയാണെങ്കില്‍ മുറികളുടെ സങ്കലനം ഒരിക്കലും അരോചകമാവുകയില്ല.

നിര്‍മ്മാണ രീതികളും വസ്തുക്കളും

സന്തുലിതമായ ഗൃഹനിര്‍മ്മാണത്തിന്റെ കാതലായ ഭാഗമാണ് ഉചിതമായ നിര്‍മ്മാണ രീതികളുടെയും വേണ്ട സാമഗ്രികളുടേയും തെരഞ്ഞെടുപ്പ്. ഇവിടെ കൃത്യമായും ചില കാര്യങ്ങള്‍ നാം പാലിക്കേണ്ടതാണ്. ഊര്‍ജ്ജക്ഷമതയുള്ളതും ചെലവു കുറഞ്ഞതും പരിസ്ഥിതിക്ക് ഒട്ടും കോട്ടം വരാത്തതുമായ രീതികളാണ് അവലംബിക്കേണ്ടത്. കേരളം നിങ്ങള്‍ക്ക് എല്ലാവര്‍ക്കും അറിയാവുന്നതുപോലെ ഉറപ്പും ആകര്‍ഷകവുമായ ഒട്ടേറെ നിര്‍മ്മാണ വസ്തുക്കളുടെ അക്ഷയ ഖനിയാണ്. കേരളത്തിലെ മണ്ണ്, കുമ്മായം, മുള, വെട്ടുകല്ല് തുടങ്ങിയ നിര്‍മ്മാണ വസ്തുക്കളുടെ വ്യാപനം അത്യന്തം ഗുണകരമായിരിക്കും. ഉറപ്പിന്റെയും ആയുസ്സിന്റെയും പേരിലുള്ള വേവലാതികള്‍ അടിസ്ഥാനരഹിതമാണ്. ശാസ്ത്രീയമായ അറിവുകളുടെ അടിസ്ഥാനത്തില്‍ ഇത്തരം നാടന്‍ രീതികള്‍ പരിപോഷിപ്പിക്കാവുന്നതേയുള്ളൂ. കേരളത്തില്‍ അതിവേഗം ഇത്തരം നിര്‍മ്മാണ രീതികള്‍ക്ക് അംഗീകാരം ലഭിക്കുന്നുണ്ട്. പ്രകൃതി വിഭവങ്ങളെ പരമാവധി കുറച്ച് ചൂഷണം ചെയ്യുന്ന മനസ്ഥിതിയാവണം എല്ലാവര്‍ക്കും. മുമ്പ് സൂചിപ്പിച്ചതുപോലെ പ്രകൃതിദത്ത വസ്തുക്കളെ അധികം ഉപയോഗിക്കുന്നത് രാജ്യതാല്പര്യങ്ങള്‍ക്ക് വിരുദ്ധമാണ്. ഒരു കാര്യം കൂടി എടുത്ത് എഴുതട്ടെ! വാതിലുകള്‍ക്കും ജനാലകള്‍ക്കും സാധാരണ തേക്കോ, പ്ലാവോ, ആഞ്ഞിലിയോ, ആണ് നാം ഉപയോഗിക്കാറ്. ഇതിന് ഒട്ടേറെ ബദല്‍ സംവിധാനങ്ങള്‍ നമ്മളുടെ വിപണിയില്‍ ഉണ്ട്. സംസ്‌കരിച്ച റബ്ബര്‍, തെങ്ങ്, മാവ് തുടങ്ങിയ തടികള്‍ ഉപയോഗിക്കുന്നത് ലാഭകരമാണ്. പൊള്ളക്കെട്ടുകള്‍, ലിന്റലിനു പകരം ആര്‍ച്ചുകള്‍, മേല്‍ക്കൂരയിലെ കോണ്‍ക്രീറ്റിനുള്ള അനവധി ബദല്‍ നിര്‍മ്മാണ രീതികള്‍, തറയൊരുക്കലിനും പെയിന്റിങ്ങിനും മറ്റ് ഫിനിഷിങ്ങിനും ഒക്കെ ബദലുകള്‍ എല്ലാം നമ്മുടെ മുമ്പിലുണ്ട്. സാധാരണ ജനാലയ്ക്കും വാതിലിനും ഉപയോഗിക്കുന്ന വില കൂടിയ പെയിന്റിനു പകരം കശുവണ്ടിക്കറ ഉപയോഗിക്കുക വഴി വന്‍ ലാഭമാണ് ഉണ്ടാവുക.

പ്രകൃതി ശക്തികള്‍

കേരളത്തിന്റെ തനതു നിര്‍മ്മാണ വിഭവങ്ങള്‍ ഉപയോഗിക്കുന്നതു വഴി ഒരു വാസ്തുശില്പത്തിന്റെ ചാരുതയേറ്റുകയാണ് നമ്മള്‍ ചെയ്യുന്നത്. ഇതിനൊപ്പം പ്രാദേശിക കാലാവസ്ഥാ പരിഗണനകള്‍ കൂടി രൂപകല്പനയില്‍ വിളക്കിച്ചേര്‍ക്കേണ്ടതുണ്ട്. ഇത്രയും സുഗന്ധവാഹിയായ കാറ്റും സൗമ്യവും ദീപ്തവുമായ സൂര്യനും കേരളത്തിന്റെ മാത്രം വരദാനമാണ്. അതുപോലെ കെട്ടിട നിര്‍മ്മാ ണത്തിന് ഏറ്റവും ഉപയുക്തമായ ഒട്ടേറെ നിര്‍മ്മാണ വസ്തുക്കള്‍ നമുക്ക് ചുറ്റും ചിതറി കിടപ്പുണ്ട്. ഇതിന്റെ സാധ്യതകള്‍ പരമാവധി ഗൃഹനിര്‍മ്മാണത്തിന് ഉപയോഗി ക്കേണ്ടതാണ്. സൂര്യ വെളിച്ചം ഉള്‍ത്തളത്തില്‍ നിറയുമ്പോള്‍ ഊര്‍ജ്ജലാഭത്തിന്റെ കാര്യം പറയേണ്ടതില്ലല്ലോ. കൈകാട്ടി വിളിച്ചാല്‍ വരുന്ന കാറ്റിനെ ക്ഷണിക്കുവാന്‍ കഴിയുന്ന രീതിയിലാവണം വാതി ലുകളുടെയും ജനാലകളുടെയും സ്ഥാനം. പാരമ്പര്യത്തിലേക്കുള്ള തിരിച്ചുപോക്കു തന്നെയായിരിക്കും സമതുലിത നിര്‍മ്മാണ രീതി പുനഃസ്ഥാപിക്കാനുള്ള എളുപ്പവഴി എന്നു കൂടി പറഞ്ഞു വയ്ക്കട്ടെ. അതുകൊണ്ടാണ് നമ്മുടെ പഴയ വീടുകളില്‍ പോകുമ്പോള്‍ നാം തണുപ്പ് തിരിച്ചറിയുന്നത്. തനതു വാസ്തുശില്പ പാരമ്പര്യം ഇതൊക്കെയും ഉള്‍ക്കൊണ്ടിരുന്നു എന്ന് നാം ആദരപൂര്‍വ്വം ഓര്‍ക്കേണ്ടതാണ്.

Comments are closed.