അവശരും ആലംബഹീനരുമായവരെ പുനരധിവസിപ്പിക്കുന്നതിനുള്ള നിരവ ധി പാര്‍പ്പിട പദ്ധതികള്‍ നമ്മുടെ സര്‍ക്കാര്‍ തലത്തിലും സന്നദ്ധ സംഘടന കളും നടപ്പിലാക്കിയിട്ടുണ്ട്. ദുരന്തമുഖത്ത് സര്‍വ്വവും നഷ്ടപ്പെട്ടവരുടെ പുനരധിവാസവും സങ്കീര്‍ണ്ണമാണ്. ലക്ഷം വീടുകള്‍ മുതല്‍ ഇങ്ങോട്ട് പരിശോധിച്ചാല്‍ ലക്ഷണയുക്തമായ ഒരു മാതൃക പോലും ചൂണ്ടിക്കാണിക്കാനില്ല. പലപ്പോഴും ഇങ്ങനെ സൗജന്യമായി നല്‍കുന്ന പാര്‍പ്പിടങ്ങള്‍ വാസയോഗ്യമല്ലാത്തതിനാല്‍ ഗുണഭോക്താക്കള്‍ ഉപേക്ഷിച്ച് പോകുന്നതാണ് ചരിത്ര യാഥാര്‍ത്ഥ്യം. ഇത്തരം സഹായ വീടുകളില്‍ താമസിക്കേണ്ടത് മനുഷ്യരാണെന്നും അവര്‍ക്കും മറ്റുള്ളവരെ പോലെ അന്തസ്സും അവകാശങ്ങളും അര്‍ഹതപ്പെട്ടതാണെന്നുമുള്ള വിചാരം ഇത്തരം പദ്ധതികളില്‍ പകര്‍ന്നു കാണാറില്ല. പരിചയസമ്പന്നരായ വാസ്തുശില്പികളെയോ സാങ്കേതിക വിദഗ്ധരെയോ സാമൂഹ്യ ശാസ് ത്രജ്ഞന്‍മാരെയോ ഉള്‍പ്പെടുത്തി ഇത്തരം പദ്ധതികളുടെ രൂപരേഖ തയ്യാറാക്കുന്ന പതിവുമില്ല. നന്മമരങ്ങളും രാഷ്ട്രീയ മേലാളന്മാരും ചേര്‍ന്ന് കണ്ണില്‍ പൊടിയിടുന്ന ചെപ്പടിവീടുകളാണ് പലപ്പോഴും പാവപ്പെട്ടവന് ലഭിക്കുന്നത്. നിസ്സഹായരായവര്‍ക്ക് ഇതൊക്കെമതി എന്ന മനോഭാവമാണ് ഉദ്യോഗസ്ഥര്‍ക്ക്. എന്നാല്‍ പതിവിന് വിപരീതമായി ആദ്യമായി ലോകോത്തര നിലവാരത്തില്‍ ഒരു പുനരധിവാസ പദ്ധതി കേരളത്തില്‍ നടപ്പിലായി.മുണ്ടക്കൈ, ചൂരല്‍മല ദുരന്തത്തില്‍ എല്ലാം നഷ്ടപ്പെട്ടവര്‍ക്കായി ഒരുക്കിയിട്ടുള്ള വയനാട് ടൗണ്‍ഷിപ്പ് എന്തുകൊണ്ടും അതിമനോഹരമാണ്. സാങ്കേതിക മികവും സൗന്ദര്യവുംസൗകര്യങ്ങളും ഒത്തിണങ്ങിയ മനോഹരമായ പാര്‍പ്പിട സംവിധാനം. അനുകരണീയമായ ഈ പദ്ധതിയുടെ വിജയ ശില്‍പികള്‍ക്ക് വാസ്തുശില്പി സമൂഹത്തിന്‍റെ ആയിരമായിരം അഭിവാദ്യങ്ങള്‍. ഈ നല്ല മനസ്സ് തുടരട്ടെ!

ഈസ്റ്റര്‍ - വിഷു ആശംസകളോടെ...

- എല്‍. ഗോപകുമാര്‍ (ചീഫ് എഡിറ്റര്‍).